文章分類: 我們的芷晴 (文欣晴)

魔鬼蛋糕

alexlwm — Mon, 07 Dec 2009 15:28:01 +0800

晴・星期一又係全世界一齊去女麻女麻屋企食飯的日子,明天係叔叔生日喎,媽媽話要買生日蛋糕,個個都話魔鬼蛋糕好好食,一於去美心買番個魔鬼蛋糕,反正有餅咭換蛋糕.快快食完飯就食蛋糕lu,大家一齊唱生日歌,叔叔吹蠟蠋就...食得啦!yummy yummy~果然好味.

尖東睇燈飾

alexlwm — Sun, 06 Dec 2009 15:01:09 +0800

晴・今早我又咳到嘔,爸媽帶我去睇醫生,話我氣管敏感喎...跟住同女麻女麻去飲茶,然後去冒險樂園玩左一陣,再回家休息.出發去尖東lu,坐西鐵去柯士甸,行去海港城,嘩!勁多人呀!!!爸媽又勁影相,食飽飽後,繼續行海旁,邊影邊行,沿路行去紅磡撘西鐡回家.

31個月大

alexlwm — Sat, 05 Dec 2009 14:23:27 +0800

晴・爸爸成日都話要去撘360,今日終於出發啦!去到東涌好大風呀!戴帽先...無人排隊既??假期都咁靜?爸爸話要坐水晶車廂,貴就貴d,但未坐過嘛,仲要買埋來回2程票添,成$300,媽媽話好貴呀!!!爸爸又唔帶9折coupon~激死媽媽啦!

排隊入去啦,好緊張呀!毎3架普通車廂就有1架水晶車廂,車廂底係透明玻璃,全程都看到下面景色,都幾正喎...不過爸媽勁影相囉.車廂内有風入既?好凍呀!好彩有帽帽姐.到站lu,指定動作~影相,對面2位外國人仲被開鏡頭,等我地一家三口影晒.不過張相我無笑囉,所以爸爸無買相,但買左2支甜筒食.

食完出發lu,周圍影相又上埋大佛,好累呀!在大佛落下來後,去左心經簡林,沿途有狗狗,仲見到牛牛,好驚呀!到啦,又影相,不過有部份維修緊,又封左路,行唔到添...回程去撘360前,媽媽話要食豆腐花,咁就坐低食完先走.

再遊迪士尼

alexlwm — Sun, 29 Nov 2009 12:28:11 +0800

晴・星期日無咩特別節目,爸媽就帶我去迪士尼樂園玩,yeah~我乖乖食飯後,坐車去迪士尼lu.入場後,等看巡遊,周圍都很多人呀...大街有飄雪,又有高高的聖誕樹,公仔又穿上聖誕衫,好有聖誕氣氛.巡遊後,入商店逛逛,我只會攪攪震又無幫襯.

去玩咖啡杯先,爸爸掛住影dv,我坐到跌落地,喊足全場,要媽媽呵呵,我唔再玩咖啡杯啦.跟住玩騎馬馬,再去小小世界,四圍有聖誕佈置,爸爸同我周圍影相,媽媽仲食雪糕添,又有樂隊演奏...玩完小小世界,之後去玩winnie the pooh,玩完出來已經天黒啦.再影影相就走lu,下次再來過吧,拜拜.

好時光開放日

alexlwm — Sat, 28 Nov 2009 11:56:46 +0800

晴・今日爸爸要返工,媽媽帶我去婆婆屋企同珈珈玩.到歩後,同婆婆一齊飲茶食包包先,回到婆婆屋企,仲未見珈珈既??原來珈珈要訓晏覺,在自己屋企還未過來這邊,唯有我自己玩住先啦.跟住媽媽同姨姨帶我去珈珈間學校玩,原來今日係開放日,可以入去參觀及玩遊戲.

一見到珈珈就立刻拖住手一齊跑去學校,入去珈珈間課室玩玩先.玩砌圖?奧巴馬??白宮??都幾難喎...整樹熊面罩?我只油顔色,仲要姨姨幫我油添.珈珈個班主任都在這邊,原來係外國人黎既,珈珈識唔識同她溝通呢?我就聽到一舊雲,又岸居居唔知做咩...再去另一間課室跳彈床,但太多人等候,去踢波波先.玩完就洗手食綿花糖,一人一支,好味好味~姨丈又攞多一支綿花糖,俾我地一齊食添,正!玩完食完仲有紀念品攞走,老師又扭波波俾我地添,真係好玩.

返婆婆屋企前,姨姨帶我地去平台遊樂場玩滑梯同韆鞦,玩到唔願走呀!

留倩影

alexlwm — Sun, 22 Nov 2009 15:21:04 +0800

晴・媽媽話我已經2歳半大啦,想去影樓影相留念,爸爸話去番上次個間,book影樓自己再影過喎.一早book左今日,但爸爸未病好,唯有要peter哥哥負責楂fit.玩左2個鐘頭,影完相後,爸爸又頂唔住要立刻上床休息.無時間同peter哥哥食飯添,下次補數啦!

p.s.唔該晒peter哥哥,我大個女啦,已經無咁驚你,今次唔洗點warm up.

又同珈珈玩

alexlwm — Sat, 21 Nov 2009 15:08:11 +0800

晴・爸爸繼續病病,未好番喎...不過都同我去婆婆屋企,又可以同珈珈玩.我地又一齊玩玩玩,食食食...食完飯後,表姨都來到婆婆屋企,但她不是來食飯喎,是來打針的.之後等埋哥哥來到就一齊走lu,我同珈珈跑呀跑呀~玩到成身汗.

收銀機

alexlwm — Fri, 20 Nov 2009 14:52:45 +0800

晴・之前媽媽買左架購物車玩具給我,只欠收銀機無買到.雖然媽媽話見吉之島有售,但好貴唔捨得買俾我玩.今日媽媽公司附近有文具開倉,要上去掃貨,因為有特價$8有六色泥膠,買左2盒給我.點之媽媽仲見到有叮礑收銀機,不過唔知價錢,要去到收銀時,看收據才知,多謝盛惠$44.我一見到個叮礑收銀機,就好鍾意喇,要媽媽立即開俾我玩,好好玩呀!

爸爸病病

alexlwm — Thu, 19 Nov 2009 14:32:33 +0800

晴・輪到爸爸唔舒服啦,自從早2日幫大叔踏回架單車番屋企後,冷病左添...今日下午頂唔住要看多次醫生,回家再休息訓覺.今晩去大叔屋企食完飯後,媽媽同我在屋企大廳,一邊玩泥膠,一邊看電視,今晩做台慶呀,無得睇宮心計添.爸爸就繼續在睡房休息,希望可以快d好番,又可以帶我去玩啦!

家長日

alexlwm — Sun, 15 Nov 2009 15:35:38 +0800

晴・一早要返學校,星期日都要返學??點解既?原來係上學期家長日,爸媽同我一齊返的.老師攞我d勞作給爸媽睇,仲讚我已經識用漿糊貼公仔,好o力o力,都未講完~爸爸已經插咀,又問這又問那...得未呀?問完未呀?我想去厠所呀~

媽媽同我去完厠所,做埋問巻就走得,跟住去邊度呀?食早餐?同女麻女麻飲茶?爸爸話問下女麻女麻去邊度飲茶先,有位就去.我要去飲茶喎,女麻女麻一定有位留俾我地既...飲完茶我拖實媽媽,死都唔跟女麻女麻及姑婆走,因為我地之後會去廸士尼嘛.

出發去廸士尼lu,去睇獅子王,未睇前,坐木船去行樹屋先,回來時,剛好入場開show.場内痾左臭臭,睇完show,一出去就要媽媽幫我換片片.姨姨他們入左樂園啦,不過各自去餐廳食野,我要食薯條.食飽飽出去見到珈珈玩泡泡,我初時還未識一齊玩,遠遠看着珈珈自己玩,之後就...同珈珈玩到癲晒.

我同爸爸一齊玩飛碟,再一齊玩巴斯光年,排隊玩埋馳車天地,又同woody影埋合照,再玩咖啡杯...珈珈第一次玩咖啡杯,玩完一次又玩多次,轉到爸爸好頭暈.跟住去玩埋騎木馬就走啦,回程行去坐車,都未到車站我已經訓着了.之後爸媽同我去葵芳食完飯,周圍行下就坐車回家啦~

飛行服務隊開放日

alexlwm — Sun, 08 Nov 2009 12:04:54 +0800

晴・因為大叔有飛行服務隊開放日的票多,我可以同爸媽一齊去睇飛機lu.今日去到東涌,嘩...好多人喎,不過安排得好好,上巴士又好順利.落車後,又排隊入場.有直升機同各樣展覧參觀,最好係睇到機場的飛機起飛.不過起飛時好嘈,而且沙塵滾滾,我好驚呀!所以要抱緊媽媽囉.場内仲碰見諾諾同飛飛添,我地一齊看直升機起飛,之後各有各睇.

參觀完就坐車回東涌,去美食廣場食d野,我仲痾埋屎屎,不過附近無育嬰室,媽媽要就地處理.之後爸媽帶我去廸士尼樂園,但我已玩到很累了,只同爸爸玩了1個遊戲,又去史廸仔玩,累到中途已睡着了.跟住爸媽抱住我睇煙花,我都未醒過,散場走lu,玩到關門.

新玩具

alexlwm — Sat, 07 Nov 2009 11:51:38 +0800

晴・今早爸爸同我玩泥膠,讓媽媽休息多陣.等中午,爸媽同我一齊去市中心食飯,去左麻酸樂食米線,食完就周圍逛逛.不過媽媽有肚痾,回家去厠所先喎.爸爸就在吉之島買左件新玩具給我,等我同爸爸回家之後,沖涼換衫,出發去婆婆屋企.又可以同珈珈玩lu,yeah...

咳到反胃

alexlwm — Wed, 04 Nov 2009 14:27:37 +0800

晴・今朝已退燒,不過媽媽放假陪我,我都一樣無返學.女麻女麻要去睇醫生,所以唔黎湊我啦,等女麻女麻順便休息一下.雖然無發燒,但我今日多次咳到反胃,仲嘔痰添...媽媽話嘔晒d痰就好番無事架啦,最重要係我要乖乖食晒d藥水喎.

蘇老師有打電話俾媽媽,原來有張通告未交,順便問問芷晴病况.媽媽今日無打番學校請假,亦都無人打來問下.

又發燒

alexlwm — Tue, 03 Nov 2009 14:18:15 +0800

欣・今日芷晴如常返學,一切正常喎,等到我倆回家時,發覺又開始發燒.原來女麻女麻中午食藥時,無食到退燒藥,唔知有無關事呢?食完飯,立即回自己屋企準備食埋夜晩的藥水,訓覺休息.

今日收到保良局的通知信,只收芷晴做下午班學生,仲要是後備生添,即係讀唔到囉,我倆決定會俾她在啓思繼續升讀k1.

鵝公喉

alexlwm — Mon, 02 Nov 2009 14:05:32 +0800

欣・昨日芷晴食左2次藥都未退燒,成個人謝晒,晩上加張退熱貼,今朝終於退燒啦!不過一開聲就嚇死人,極似張栢芝,連她自己聽到都笑自己.今日無俾芷晴返學,honey放假照顧她,一切順利,但honey自己都病病地.食緊抗生素,芷晴一日痾5次,雖然痾多次,但她忍到的,唔會頼屎喎.

晩上校長打電話來,我還以為她緊張芷晴的病情,原來唔係喎,就連芷晴今日無返學都唔知添.校長係通知我布老師將會調去教高班,而曾主任會來小組班,與蘇老師一同任教.希望芷晴可以適應到新老師啦,因為她害怕陌生人的.